Zoea ging det veuger
Jantje, Pitje, Frenske, Truuske,
Sjarel, Bertje, en oos Huùb
Waekelikse candidate
Väör einsjrobbäört inne kuüb
Moder greep het raochel iezer
Poeakdje duchtig inne stoof
Greep eine kaetel bie zien oeare
Leefs de grotste dae het goof
Pompdje dae dén vol met water
Staokdje flot de stoof zoea heit
Deste kuumdjes vanne wörmdje
Enste naad woors vanne zweit
És det water in dae kaetel
Kaokdje wie eine ertwepot
Sjriëwdje moder, oet eur lommele
Spoojdj uch ins e bietje flot
Get kawd derbie, en den mer sjrobbe
De voeligheid van ein ganse waek
Vies straotverkes, zoae reep den moder
Geer zeentj weer oet, zoae zwart wie paek
Zoea ging den eine nao den angere
De kuup in, en het water, och,
Ein klats werm derbie, mer het woor steeds zwarter,
Jus ein duuster onwaersloch
Toch kome weer nao al det sjrobbe
Nog praoper oet det modderbad
Weer blonke pront wie eine spegel
És moder os tösse haw gehadj
Mer in eine kiër, dao reep oos Sjarel
Zek moder, és geer het nog neet wis
Ich en Truuke, en auch oos Bertje
Höbbe inne kuup gepis
P.Feller, Echt